Io vulesse truvà pace...

Napoli 24 maggio 1900 – Roma 31 ottobre 1984

Io vulesse truvà pace;

ma na pace senza morte.
Una, mmieze'a tanta porte,
s'arapesse pè campà.
S'arapesse na matina,
na matin' 'e primavera,
e arrivasse fin' 'a sera
senza dì: " nzerràte llà ! "
Senza sentere cchiù 'a ggente
ca te dice: " io faccio..., io dico ",
senza sentere l'amico
ca te vene a cunziglià.
Senza senter' 'a famiglia
ca te dice: " Ma ch' 'he fatto ? "
Senza scennere cchiù a patto
cu' 'a cuscienza e 'a dignità.
Senza leggere 'o giurnale...
'a nutizia impressionante,
ch'è nu guaio pè tutte quante
e nun tiene che ce fà.
Senza sentere 'o duttore
ca te spiega a malatia...
'a ricett' in farmacia...
l'onorario ch' 'he 'a pavà.
Senza sentere stu core
ca te parla 'e Cuncettina,
Rita, Brigida, Nannina...
Chesta sì...Chell'ata no.
Pecchè, insomma, si vuò pace
e nun sentere cchiù niente,
'e 'a sperà ca sulamente
ven' 'a morte a te piglià ?
Io vulesse truvà pace
ma na pace senza morte.
Una, mmiez' 'a tanta porte
s'arapesse pè campà !
S'arapesse na matina,
na matin' 'e primavera,
e arrivasse fin' 'a sera
senza dì: " nzerràte llà  ! "

Eduardo de Filippo